യുഎഇയിൽ കനത്ത മൂടൽമഞ്ഞ്: റെഡ് അലർട്ട് പ്രഖ്യാപിച്ചു; വേഗത പരിധി കുറച്ചു

അബുദാബി :യുഎഇയിൽ കനത്ത മൂടൽമഞ്ഞ്: റെഡ് അലർട്ട് പ്രഖ്യാപിച്ചു; വേഗത പരിധി കുറച്ചു. പ്രവാസികൾ ജാഗ്രത പലിക്കുക വിമാന സർവ്വീസുകൾ വൈകാൻ സാദ്ധ്യത.പുതുവർഷത്തിന്റെ തുടർച്ചയായി യുഎഇയുടെ വിവിധ ഭാഗങ്ങളിൽ ഇന്നും കനത്ത മൂടൽമഞ്ഞ് (Fog) അനുഭവപ്പെട്ടു. കാഴ്ചപരിധി കുറഞ്ഞതിനെ ത്തുടർന്ന് ദേശീയ കാലാവസ്ഥാ നിരീക്ഷണ കേന്ദ്രം (NCM) രാജ്യത്തിന്റെ വിവിധയിടങ്ങളിൽ യെല്ലോ, റെഡ് അലർട്ടുകൾ പുറപ്പെടുവിച്ചു. ഇന്ന് പുലർച്ചെ 12 മണി മുതൽ രാവിലെ 10 മണി വരെയായിരുന്നു ജാഗ്രതാ നിർദ്ദേശം.
അബുദാബിയിലും ദുബായിലും അനുഭവപ്പെട്ട കനത്ത മൂടൽമഞ്ഞ് ജനജീവിതത്തെയും ഗതാഗത ത്തെയും ബാധിച്ചു. ദൂരക്കാഴ്ച പരിമിതമായ സാഹചര്യത്തിൽ റോഡപകടങ്ങൾ ഒഴിവാക്കാൻ അബുദാബി പോലീസ് വേഗത പരിധിയിൽ മാറ്റം വരുത്തിയിട്ടുണ്ട്.
പ്രധാന വിവരങ്ങൾ:
* വേഗത പരിധി കുറച്ചു: മക്തൂം ബിൻ റാഷിദ് റോഡിൽ (അൽ ഷഹാമ – സെയ്ഹ് അൽ സെദിറ) വേഗത പരിധി മണിക്കൂറിൽ 100 കിലോമീറ്ററിൽ നിന്നും 80 കിലോമീറ്ററായി കുറച്ചു.
* കാലാവസ്ഥ: അബുദാബിയിൽ കുറഞ്ഞ താപനില 15°C ഉം കൂടിയ താപനില 24°C ഉം ആയിരിക്കും. ദുബായിൽ ഇത് 13°C മുതൽ 24°C വരെയാണ്.
വാഹനമോടിക്കുന്നവർക്കുള്ള നിർദ്ദേശങ്ങൾ സുരക്ഷിതമായ യാത്ര ഉറപ്പാക്കാൻ ദേശീയ കാലാവസ്ഥാ നിരീക്ഷണ കേന്ദ്രം ചില പ്രധാന നിർദ്ദേശങ്ങൾ നൽകിയിട്ടുണ്ട്:
* നിശ്ചയിച്ചിട്ടുള്ള വേഗത പരിധി കർശനമായി പാലിക്കുക.
* മുന്നിലുള്ള വാഹനവുമായി കൃത്യമായ അകലം പാലിക്കുക.
* വാഹനമോടിക്കുമ്പോൾ ഹസാർഡ് ലൈറ്റുകൾ (Hazard lights) ഉപയോഗിക്കരുത്.
* സ്വന്തം ലെയിനിൽ തന്നെ വാഹനം ഓടിക്കാൻ ശ്രദ്ധിക്കുക.
തെറ്റായ വിവരങ്ങളും പ്രചരിപ്പിക്കരുതെന്നും ഔദ്യോഗിക കാലാവസ്ഥാ അറിയിപ്പുകൾ മാത്രം പിന്തുടരണമെന്നും അധികൃതർ ജനങ്ങളോട് അഭ്യർത്ഥിച്ചു.