വിദേശത്ത് നിന്നും എത്തുന്നവർക്ക് ആശ്വാസം: ബാഗേജ് നിയമങ്ങളിൽ വൻ മാറ്റം; ഡ്യൂട്ടി ഫ്രീ പരിധി 75,000 രൂപയായി ഉയർത്തി

ന്യൂഡെൽഹി :-വിദേശത്ത് നിന്നും എത്തുന്നവർക്ക് ആശ്വാസം: ബാഗേജ് നിയമങ്ങളിൽ വൻ മാറ്റം; ഡ്യൂട്ടി ഫ്രീ പരിധി 75,000 രൂപയായി ഉയർത്തി.വിദേശത്തുനിന്നും ഇന്ത്യയിലേക്ക് വരുന്ന യാത്രക്കാർക്ക് കൊണ്ടുവരാവുന്ന സാധനങ്ങളുടെ നികുതിയില്ലാത്ത (Duty-free) പരിധി കേന്ദ്രസർക്കാർ വർദ്ധിപ്പിച്ചു. നിലവിലുണ്ടായിരുന്ന 50,000 രൂപ എന്ന പരിധി 75,000 രൂപയായാണ് ഉയർത്തിയത്. പുതുക്കിയ ബാഗേജ് റൂൾസ് 2026 പ്രകാരം ഫെബ്രുവരി 2 അർദ്ധ രാത്രി മുതൽ ഈ മാറ്റങ്ങൾ നിലവിൽ വരും.
പത്ത് വർഷമായി നിലനിന്നിരുന്ന ബാഗേജ് നിയമങ്ങൾ പരിഷ്കരിച്ചു കൊണ്ടാണ് പുതിയ വിജ്ഞാപനം പുറത്തിറക്കിയത്. പ്രധാന മാറ്റങ്ങൾ താഴെ പറയുന്നവയാണ്:
പ്രധാന ഇളവുകൾ ഒറ്റനോട്ടത്തിൽ:
* ഇന്ത്യൻ വംശജർക്ക്: വിദേശത്ത് നിന്ന് വിമാനത്തിലോ കപ്പലിലോ എത്തുന്ന ഇന്ത്യൻ വംശജരായ വിനോദസഞ്ചാരികൾക്കും ഇന്ത്യയിൽ താമസിക്കുന്നവർക്കും 75,000 രൂപ വരെയുള്ള സാധനങ്ങൾ നികുതിയില്ലാതെ കൊണ്ടുവരാം. (കരമാർഗ്ഗം എത്തുന്നവർക്ക് ഇത് ബാധകമല്ല).
* വിദേശ വിനോദസഞ്ചാരികൾക്ക്: വിദേശികൾക്ക് കൊണ്ടുവരാവുന്ന സാധനങ്ങളുടെ പരിധി 15,000 രൂപയിൽ നിന്നും 25,000 രൂപയായി വർദ്ധിപ്പിച്ചു.
* സ്വർണ്ണാഭരണങ്ങൾ: ഒരു വർഷ ത്തിലേറെ വിദേശത്ത് താമസിച്ച ശേഷം മടങ്ങിയെത്തുന്നവർക്ക് സ്വർണ്ണാഭരണങ്ങൾ കൊണ്ടുവരു ന്നതിലും ഇളവുകളുണ്ട്:
* സ്ത്രീകൾക്ക്: 40 ഗ്രാം വരെ സ്വർണ്ണാഭരണങ്ങൾ നികുതിയി ല്ലാതെ കൊണ്ടുവരാം.
* മറ്റുള്ളവർക്ക്: 20 ഗ്രാം വരെയാണ് അനുവദനീയമായ പരിധി.സ്വർണ്ണം, വെള്ളി, പ്ലാറ്റിനം തുടങ്ങിയ വില പിടിപ്പുള്ള ലോഹങ്ങൾ കൊണ്ട് നിർമ്മിച്ച ആഭരണങ്ങൾക്കാണ് ഈ ഇളവ് ലഭിക്കുക. പത്ത് വർഷത്തിന് ശേഷമുള്ള ഈ നിയമപരിഷ്കാരം പ്രവാസി കൾക്കും വിദേശത്തുനിന്ന് മടങ്ങുന്നവർക്കും വലിയ ആശ്വാസമാകുമെന്നാണ് വിലയിരുത്തപ്പെടുന്നത്.