ദുബായ്: –നവംബർ 24 മുതൽ ദുബായിൽ രണ്ട് പുതിയ ടോൾ ഗേറ്റുകൾ പ്രവർത്തനക്ഷമമാകുമെന്ന് സാലിക് പ്രഖ്യാപിച്ചു. ദുബായ് സാലിക്കിലെ പുതിയ രണ്ട് ടോള്‍ഗേറ്റുകള്‍ നവംബര്‍ 24 മുതലാണ് പ്രവര്‍ത്തനമാരംഭിക്കുന്നത്.. ‘ബിസിനസ് ബേ ഗേറ്റ്’, ‘അല്‍ സഫ സൗത്ത് ഗേറ്റ്’ എന്നിവയാണ് പുതിയ ടോള്‍ ഗോറ്റുകള്‍. ഇതോടെ ദുബായില്‍ സാലിക്ക് പ്രവര്‍ത്തിപ്പിക്കുന്ന ടോള്‍ഗേറ്റുകളുടെ എണ്ണം 10 ആയി. സാലിക് പുതിയ ഗേറ്റുകള്‍ ആരംഭിക്കുന്ന കാര്യം ഓഗസ്റ്റ് 28-ന് പ്രഖ്യാപിച്ചിരുന്നു. അവയാണ് ഈ മാസം അവസാന വാരത്തില്‍ പ്രവര്‍ത്തനം തുടങ്ങുന്നത്.പുതിയ രണ്ട് ടോള്‍ ഗേറ്റുകള്‍ ശെയ്ഖ് സായിദ് റോഡ് സ്ട്രെച്ചിലൂടെയും പുറത്തേക്കും വാഹന നീക്കം കൂടുതല്‍ സുഗമവും കാര്യക്ഷമവുമാവുമെന്ന് അധികൃതര്‍ അറിയിച്ചു. ബിസിനസ് ബേ ഗേറ്റ്, അല്‍ സഫ സൗത്ത് ഗേറ്റ് എന്നിവിടങ്ങളിലാണ് പുതിയ സാലിക്ക് ഗേറ്റുകള്‍ വരുന്നത്. അല്‍ ഖൈല്‍ റോഡിലെ ബിസിനസ് ബേ ക്രോസിംഗിലും അല്‍ മൈദാന്‍ സ്ട്രീറ്റിനും ഉമ്മുല്‍ ഷെയ്ഫ് സ്ട്രീറ്റിനും ഇടയിലുള്ള ശെയ്ഖ് സായിദ് റോഡിലെ അല്‍ സഫ സൗത്തിലും സ്ഥിതി ചെയ്യുന്ന രണ്ട് പുതിയ ടോള്‍ ഗേറ്റുകള്‍ കൂടി വരുന്നതോടെ ദുബായിലെ സാലിക് ഗേറ്റുകളുടെ എണ്ണം എട്ടില്‍ നിന്ന് 10 ആയി ഉയരും.ഷാര്‍ജ, അല്‍ നഹ്ദ, അല്‍ ഖുസൈസ് എന്നിവിടങ്ങളില്‍ നിന്നുള്ള വാഹനങ്ങള്‍ എമിറേറ്റിലെ ഏറ്റവും തിരക്കേറിയ റോഡുകളിലൊന്നായ അല്‍ ഖൈല്‍ റോഡിലേക്ക് പ്രവേശിക്കാന്‍ ഉപയോഗിക്കുന്ന പാലമെന്ന നിലയില്‍ ബിസിനസ് ബേയിലെ പാലം ഏറെ തിരക്കേറിയ കേന്ദ്രമാണ്. പുതിയ ഗേറ്റുകള്‍ ഇതുവഴിയുള്ള ട്രാഫിക്ക് 16 ശതമാനം വരെ കുറയ്ക്കുമെന്ന് സാലിക് സിഇഒ ഇബ്രാഹിം അല്‍ ഹദ്ദാദ് പറഞ്ഞു. പുതിയ സാലിക് ഗേറ്റുകള്‍ വരുന്നതോടെ അല്‍ ഖൈല്‍ റോഡില്‍ 12 മുതല്‍ 15 ശതമാനം വരെയും അല്‍ റബാത്ത് സ്ട്രീറ്റില്‍ 10 മുതല്‍ 16 ശതമാനം വരെയും ട്രാഫിക് കുറയും. അതേപോലെ ശെയ്ഖ് സായിദ് റോഡില്‍ നിന്ന് മൈദാന്‍ സ്ട്രീറ്റിലേക്ക് വലത്തോട്ടുള്ള ട്രാഫിക് 15 ശതമാനം കുറയും. ഫിനാന്‍ഷ്യല്‍ സെന്റര്‍ സ്ട്രീറ്റിനും മെയ്ദാന്‍ സ്ട്രീറ്റിനും ഇടയിലുള്ള ഗതാഗതം ഇത് മെച്ചപ്പെടുത്തും.

പുതിയ സാലിക് ടോള്‍ ഗേറ്റ് പ്രവാസികൾ അറിഞ്ഞിരിക്കേണ്ട കാര്യങ്ങൾ.

ഗേറ്റുകൾപ്രവർത്തനക്ഷമമാകുന്നതിനുമുൻപായി പൊതുജനങ്ങൾക്ക് ഇതുസംബന്ധിച്ച നിർദേശങ്ങളും നൽകും. പുതിയ ഗേറ്റുകളുടെ പ്രവർത്തനം പൂർണമായും സൗരോർജത്തിലായിരിക്കും.

പുതിയ ഗേറ്റുകളിലെ നിരക്കുകൾ, സമയക്രമം എന്നിവ ഇതുവരെ പ്രഖ്യാപിച്ചിട്ടില്ല. നിലവിൽ ഒരു വാഹനം ഗേറ്റുവഴി കടന്നുപോകുമ്പോൾ നാലുദിർഹമാണ് സാലിക് ഈടാക്കുന്നത്.

വാഹനത്തിന്റെ വിൻഡ്ഷീൽഡിൽ സാലിക് സ്റ്റിക്കറുകൾ നിർബന്ധമായും പതിപ്പിക്കണം. പുതിയ വാഹനം വാങ്ങിയാലുടൻ സാലിക് സ്റ്റിക്കറും മറക്കാതെ വാങ്ങണം. വാഹനത്തിന്റെ മുൻവശത്താണ് സ്റ്റിക്കർ പതിപ്പിക്കേണ്ടത്. റേഡിയോ ഫ്രീക്വൻസി ഐഡന്റിഫിക്കേഷൻ (ആർ.എഫ്.ഐ.ഡി.) സാങ്കേതികവിദ്യയുപയോഗിച്ചാണ് സാലിക് പ്രവർത്തിക്കുന്നത്.

കഴിഞ്ഞവർഷം എട്ട് സാലിക് ഗേറ്റുകളിലായി 59.3 കോടി ട്രിപ്പുകൾ രേഖപ്പെടുത്തിയിട്ടുണ്ട്. ഈ വർഷത്തിന്റെ ആദ്യപകുതിയിലെ 23.8 കോടി യാത്രകൾ വഴി സാലികിന്റെ അർധവാർഷിക വരുമാനം 110 കോടി ദിർഹമായി ഉയർന്നു.

കഴിഞ്ഞവർഷം ഇതേ കാലയളവിനെയപേക്ഷിച്ച് വരുമാനത്തിൽ 5.6 ശതമാനം വർധനയാണ് രേഖപ്പെടുത്തിയത്.

നിലവിൽ അൽ ബർഷ, അൽ ഗർഹൂദ് പാലം, അൽ മക്തൂം പാലം, അൽ മംസാർ സൗത്ത്, അൽ മംസാർ നോർത്ത്, അൽ സഫ, എയർപോർട്ട് ടണൽ, ജബൽ അലി എന്നീപ്രദേശങ്ങളിലായി എട്ട് സാലിക് ഗേറ്റുകളാണുള്ളത്. പ്രധാന റോഡുകൾക്കുപുറമേ ജൂൺമുതൽ ദുബായ് മാളിലെ പാർക്കിങ്ങിലും സാലിക് ഏർപ്പെടുത്തിയിട്ടുണ്ട്.

റിയാദ് ;-സൗദി അറേബ്യ ശീതീകരിച്ച ഭക്ഷ്യവസ്തുക്കളുടെ ഫാക്ടറികൾക്ക് പുതിയ നിയമം കൊണ്ടുവന്നു.2025 ജനുവരി മുതൽ ഭക്ഷ്യവസ്തുക്കൾ ഉൽപ്പാദിപ്പിക്കുന്ന ഫാക്ടറികൾ ശീതീകരിച്ച് സൂക്ഷിക്കുന്ന (ഫ്രോസൺ) ഉൽപന്നങ്ങളുടെയും കോൾഡ് സ്റ്റോറേജിന്‍റെയും അനുബന്ധ സൗകര്യങ്ങളുടെയും താപനില ‘വസൽ’ പ്ലാറ്റ്‌ഫോമുമായി ബന്ധിപ്പിച്ച് അപ്ഡേറ്റ് ചെയ്യണം. ശീതീകരിച്ച ഭക്ഷ്യ വസ്തുക്കളുണ്ടാക്കുന്നഫാക്ടറികൾക്കും വെയർഹൗസുകൾക്കും ഉൽപന്നങ്ങൾ കൊണ്ടുപോകുന്ന വാഹനങ്ങൾക്കും തീരുമാനം ബാധകമാകും.ശീതീകരിച്ച ഭക്ഷ്യവസ്തുക്കളുടെ ഫാക്ടറികൾ, വെയർഹൗസുകൾ, കൊണ്ടുപോകാൻ ഉപയോഗിക്കുന്ന വാഹനങ്ങൾ എന്നിവയിലെ താപനിലയും ഈർപ്പവും അളക്കുന്ന മീറ്ററുകളെ ഓൺലൈനായി ‘വസൽ’ പ്ലാറ്റ്‌ഫോമുമായി ബന്ധിപ്പിക്കാനാണ് ഫുഡ് ആൻഡ് ഡ്രഗ് അതോറിറ്റി ഉദ്ദേശിക്കുന്നത്. ഫുഡ് ആൻഡ്ഡ്രഗ് അതോറിറ്റി ഉദ്ദേശിക്കുന്നത്. ഫുഡ് ആൻഡ് ഡ്രഗ് അഡ്മിനിനിസ്‌ട്രേഷൻ ‘എസ്റ്റിലാ’ പ്ലാറ്റ്‌ഫോമിൽ അവതരിപ്പിച്ച ഒരു പുതിയ പദ്ധതിയിലൂടെയാണ് ഇതിന് തയ്യാറെടുക്കുന്നത്.

ഉപഭോക്തൃ ആരോഗ്യവും സുരക്ഷയും മെച്ചപ്പെടുത്തുന്നതിനുള്ള അതോറിറ്റിയുടെ ശ്രമങ്ങളുടെയും പൊതുതാൽപ്പര്യവും പൊതുജനാരോഗ്യവും കൈവരിക്കുന്നതിന് സർക്കാർ ഏജൻസികളും സ്വകാര്യമേഖലയും തമ്മിലുള്ള സംയോജിത പ്രവർത്തനത്തിെൻ്റെചട്ടക്കൂടിനുള്ളിലാണിത്. ഭക്ഷ്യശൃംഖലയുടെ ഘട്ടങ്ങളിൽ ഭക്ഷ്യസുരക്ഷക്ക് ഉണ്ടാകാവുന്ന അപകടസാധ്യതകളെ അടിസ്ഥാനമാക്കിയുമാണ്.
‘ശീതീകരിച്ച ഭക്ഷ്യവസ്തുക്കൾ കൊണ്ടുപോകുന്നതിനും സംഭരിക്കുന്നതിനുമുള്ള പൊതുവായ നിബന്ധനകൾ’ എന്നതിനായുള്ള സാങ്കേതിക വ്യവസ്ഥകളെ അടിസ്ഥാനമാക്കിയുള്ളതാണ് പദ്ധതി. താപനില പുറത്ത് നിന്ന് എളുപ്പത്തിൽ വായിക്കാൻ കഴിയുന്ന ഒരു സ്ഥലത്തായിരിക്കണമെന്നും വ്യവസ്ഥയിലുണ്ട്. ശീതീകരിച്ച ഭക്ഷ്യവസ്തുക്കൾ ഉണ്ടാക്കുന്ന എല്ലാ ഫാക്ടറികളോടും വെയർഹൗസുകളോടും അവയുടെ ഗതാഗത മാർഗങ്ങളോടും അതോറിറ്റി നിശ്ചയിക്കുന്ന വ്യവസ്ഥകളും താപനില സൂചിപ്പിക്കുന്ന ഇലക്ട്രോണിക് ലിങ്കേജും പൂർത്തിയാക്കാൻ ഫുഡ് ആൻറ് ഡ്രഗ് അതോറിറ്റി ആവശ്യപ്പെട്ടു. 2025 ജനുവരി മുതൽ ഈ മൂന്ന് വ്യവസ്ഥകളും നിർബന്ധമാവും.

റിയാദ്: സൗദിയിൽ പ്രാദേശിക ആസ്ഥാനമുള്ള വിദേശ കമ്പനികളുടെ എണ്ണം 540 ആയി വർധിച്ചെന്ന് നിക്ഷേപ മന്ത്രി ഖാലിദ് അൽഫാലിഹ് വ്യക്തമാക്കി. റിയാദിൽ ഫ്യൂച്ചർ ഇൻവെസ്റ്റ്മെൻറ് ഇനിഷ്യേറ്റീവ് എട്ടാമത് അന്താരാഷ്ട്ര സമ്മേളനത്തിെൻറ ഉദ്ഘാടന സെഷനിൽ സംസാരിക്കുകയായിരുന്നു മന്ത്രി. ഇതിൽ ചിലത് ഏറ്റവും വലിയ ബഹുരാഷ്ട്രകമ്പനികളാണ്.”വിഷൻ 2030’ ലക്ഷ്യം വെച്ചത് 2030-ഓടെ 500 കമ്പനികൾ എന്നതാണ്. എന്നാൽ അഞ്ച് വർഷം ബാക്കിയുള്ളപ്പോൾ തന്നെ ആ ലക്ഷ്യം മറികടന്നു.

2016-ൽ ‘വിഷൻ 2030’ ആരംഭിച്ചതിന് ശേഷം മൊത്ത ആഭ്യന്തര ഉൽപ്പാദനം (ജി.ഡി.പി) 70 ശതമാനത്തിലധികം വളർന്നു. 2014 മുതൽ പ്രതിവർഷം നാല് മുതൽ അഞ്ച് വരെ ശതമാനം എണ്ണയിതര സമ്പദ്‌ വ്യവസ്ഥയുടെ വളർച്ചക്ക് വിഷൻ സംരംഭങ്ങൾ സംഭാവന നൽകിയിട്ടുണ്ട്.ജി20 രാജ്യങ്ങളിൽ അതിവേഗം വളരുന്ന രണ്ടാമത്തെ സമ്പദ് വ്യവസ്ഥയാണ് സൗദിയുടേതെന്നും മന്ത്രി ചൂണ്ടിക്കാട്ടി. സൗദി സാമ്പത്തിക വ്യവസ്ഥ മധ്യപൂർവേഷ്യയുടെ സാമ്പത്തിക കേന്ദ്രമാണ്. മേഖലയിലെ യുദ്ധവും ചെങ്കടലിലെ കപ്പൽഗതാഗത അസ്വസ്ഥതകളും ഇതിനെ കാര്യമായി ബാധിച്ചില്ല. കാരണം വളർച്ചയെ പ്രേരിപ്പിക്കുന്ന ഘടകങ്ങൾ തടസ്സപ്പെടുത്തുന്നതിനേക്കാൾ കൂടുതലാണ്. സമ്പദ്‌ വ്യവസ്ഥയുടെ ശക്തിയാൽ ആഗോളതലത്തിൽ വിവിധ ഭൗമരാഷ്ട്രീയ വെല്ലുവിളികളെ അഭിമുഖീകരിക്കാൻ സൗദി അറേബ്യക്ക് കഴിഞ്ഞു.

സൗദിയിലേക്ക് 3.3 ലക്ഷം കോടി ഡോളർ നേരിട്ടുള്ള നിക്ഷേപമാണ് ലക്ഷ്യമിടുന്നത്. അത് ഞങ്ങൾ നേടും. അതിനെ വളർച്ച മൂലധന സമവാക്യം എന്ന് ഞങ്ങൾ വിളിക്കുന്നു. ഈ സമവാക്യം വർഷം തോറും എട്ട് ശതമാനം എന്നതിന് തുല്യമായി വളരുകയാണ്. ‘വിഷൻ 2030’ ആരംഭിച്ചതിന് ശേഷം രാജ്യത്ത് പ്രവർത്തിക്കാൻ നിേക്ഷപ ലൈസൻസ് നേടിയ വിദേശ കമ്പനികളുടെ എണ്ണം 10 മടങ്ങ് വർധിച്ചു. വിനോദസഞ്ചാര മേഖലയിൽ, കഴിഞ്ഞ വർഷം സൗദിയിലെത്തിയ ടൂറിസ്റ്റുകളുടെയും സന്ദർശകരുടെയും എണ്ണം 10 കോടി ആയതായും മന്ത്രി പറഞ്ഞു.

നിയമലംഘകർക്ക് ആറുമാസം മുതൽ 10 വർഷം വരെ തടവും അഞ്ചു ലക്ഷം ദിർഹം മുതൽ 20 ലക്ഷം ദിർഹം വരെ പിഴയുമാണ് ശിക്ഷ

ദുബായ്: – യു എ ഇയിൽ സോഷ്യൽ മീഡിയയിലൂടെ നിങ്ങളെ ആരെങ്കിലും അപമാനിക്കാൻ ശ്രമിച്ചോ.. ?ജോലി സ്ഥലത്ത് ആരെങ്കിലും നിങ്ങളോട് വിവേചനം കാട്ടിയോ…?ഭയപ്പെടേണ്ട ദുബായ് ഭരണകൂടം നിങ്ങളോടൊപ്പമുണ്ട്. കാരണം സഹിഷ്ണുതയും സമാധാനവും പ്രദാനംചെയ്യുന്ന രാജ്യമാണ് യു.എ.ഇ. ഇവിടെ മതം, ജാതി, ലിംഗം, വംശം തുടങ്ങി എല്ലാത്തരം വിവേചനങ്ങളും റിപ്പോർട്ട് ചെയ്യാൻ ഒട്ടേറെ മാർഗങ്ങൾ നിലവിലുണ്ട്. വിവേചനങ്ങൾക്കെതിരേ 2015-ലാണ് യു.എ.ഇയിൽ നിയമം പ്രാബല്യത്തിലായത്. പിന്നീട്, 2023-ൽ കൂടുതൽ ശിക്ഷാനടപടികൾചേർത്ത് ഭേദഗതിചെയ്തു.മതവിദ്വേഷമുണ്ടാക്കുന്ന പദപ്രയോഗവും പ്രസംഗവും, അവഹേളനം, ഓൺലൈൻ വഴി അപമാനിക്കൽ, ജോലി സ്ഥലത്തെ വിവേചനം തുടങ്ങി ഏതൊരു പ്രവൃത്തിയും ഈ രാജ്യത്ത് കുറ്റകരമാണ്. ഇത്തരം സംഭവങ്ങളുണ്ടായാൽ അധികാരികളെ നേരിട്ട് അറിയിക്കാം. യു.എ.ഇ. പോലീസിന്റെ ഓൺലൈൻ സേവനങ്ങൾവഴി പരാതി നൽകാം. നിയമലംഘകർക്ക് ആറുമാസം മുതൽ 10 വർഷം വരെ തടവും അഞ്ചു ലക്ഷം ദിർഹം മുതൽ 20 ലക്ഷം ദിർഹം വരെ പിഴയുമാണ് ശിക്ഷ.

പരാതി നൽകാൻ

അബുദാബി പോലീസിന്റെ അമാൻ സേവനത്തിലൂടെ 8002626, 8002828 എന്ന നമ്പറുകളിലേക്ക് എസ്.എം.എസ്. അയക്കാം.

ദുബായ് പോലീസിന്റെ അൽ അമീൻ സേവനത്തിലൂടെ 8004888 എന്ന നമ്പറിലോ യു.എ.ഇ.ക്ക് പുറത്തുള്ളവർക്ക് +9718004888 എന്ന നമ്പറിലൂടെയോ പരാതികൾ നൽകാം.

ഷാർജ പോലീസിന്റെ നജീദ് സേവനത്തിലൂടെ 800151 എന്ന നമ്പറിലേക്ക് എസ്.എം.എസ്. ചെയ്യാം. അല്ലെങ്കിൽ 7999 നമ്പറും ഉപയോഗിക്കാം.ജുഡീഷ്യൽ അധികാരികൾ മുഖേന പരാതി നൽകി കേസ് ഫയൽ ചെയ്യാം.
സ്വകാര്യ മേഖലയിലെ ജീവനക്കാർക്ക് മാനവവിഭവശേഷി, സ്വദേശിവത്കരണ മന്ത്രാലയത്തിന്റെ (ഹ്യൂമൻ റിസോഴ്‌സസ് ആൻഡ് ഇമിറേറ്റൈസേഷൻ മന്ത്രാലയം) ഓൺലൈൻ ചാനലുകൾ വഴി ജോലിസ്ഥലത്തെ വിവേചനം റിപ്പോർട്ട് ചെയ്യാം. പരാതിക്കൊപ്പം കേസിനെ പിന്തുണയ്ക്കുന്ന കാര്യമായ തെളിവുകൾ ഹാജരാക്കണം. മന്ത്രാലയത്തിന്റെ വെബ്‌സൈറ്റിൽനിന്നോ അല്ലെങ്കിൽ ഓഫീസുകളിൽനിന്നോ ഔദ്യോഗിക പരാതി ഫോറം ലഭിക്കും.സർക്കാർ മേഖലയിലെ ജീവനക്കാർക്ക് ഫെഡറൽ അതോറിറ്റി ഫോർ ഗവൺമെന്റ് ഹ്യൂമൻ റിസോഴ്സസിന്റെ ഓൺലൈൻ പ്ലാറ്റ്‌ഫോമുകളിലൂടെപരാതികളറിയിക്കാം.തെളിവുകൾ ഒപ്പം ഹാജരാക്കുന്നത് പ്രശ്‌നപരിഹാരത്തിനുള്ള സാധ്യത മെച്ചപ്പെടുത്തും. സാക്ഷിമൊഴികളും സമർപ്പിക്കാം.മനുഷ്യാവകാശ പരാതികൾ ഹ്യൂമൻ റൈറ്റ്‌സ് ഓഫീസ് ജൂഡീഷ്യൽ ഡിപ്പാർട്ട്‌മെന്റ്, അബുദാബി കമ്യൂണിറ്റി അതോറിറ്റി (സി.ഡി.എ) എന്നിവിടങ്ങളിൽ റിപ്പോർട്ട് ചെയ്യാം. സി.ഡി.എ.യുടെ 8002121 എന്ന ടോൾ ഫ്രീ നമ്പറിൽ ബന്ധപ്പെടാം. അല്ലെങ്കിൽ human_rights@cda.gov.ae എന്ന വിലാസത്തിൽ ഇ-മെയിൽ ചെയ്യാം.മനുഷ്യാവകാശ പരാതികൾ ഹ്യുമൻ റൈറ്റ്‌സ് ഇൻസ്റ്റിറ്റ്യൂഷനിലും അറിയിക്കാം. (https://nhriuae.com/en)വിവേചന പ്രശ്നങ്ങൾ യു.എ.ഇ യിലെ സഹിഷ്ണുത, സഹവർത്തിത്വ മന്ത്രാലയത്തിലും അറിയിക്കാം. info@tolerance.gov.ae എന്ന വിലാസത്തിൽ ഇമെയിൽ ചെയ്യുക.